RRITJA E INTERESAVE DHE LUHATJET NË TREGJET FINANCIARE

Ndryshimi i kahut të politikës monetare që luan Banka e Shqipërisë, në një politikë të shpejtë shtërnguese duke rritur normat e interesit 4 herë në një periudh mjaft të shkurtër, padyshim që ka krijuar një efekt zinxhir në tregjet financiare. Ndikimi i kësaj politike monetare është reflektuar direkt në anën e ofertës për fonde, ku indikatori më i qartë është rritja e normave të kredive, por edhe tek rritja e normave të titujve të borxhit qeveritar (bono dhe obligacione thesari), cmimi me të cilin publiku i jep hua Qeverisë. Ndikim ka pasur edhe në anën e kërkesës, ku indikatori më i qartë është rritja e normave të depozitae bankare, por kjo ka ndodhur me një ritëm mjaft te avashtë. 

Në studio ekspertët diskutuan në lidhje me shkaqet që cuan Bankën e Shqipërisë në marrjen e një vendimi të qartë dhe të menjëhershëm për rritjen e normave të interesit me qëllim frenimin e normës së lartë të inflacionit, e cila për muajin Nëntor 2022 arriti në nivelin e mbi 11%, duke thyer rekordet e historikut të këtij indikatori. Gjithashtu, debati u orientua tek rritja e kostotove të agjentëve ekonomikë për shkak të rritjes së normave të kredive, të cilat pritet që të rrudhin kreditimin e ekonomisë. Ekspertët sqaruan faktin që pikërisht ky ishte edhe qëllimi i politikës monetare shtërnguese që BSH po luan, për reduktimin e ofertës monetare ne ekonoinë e brendshme të vendit, edhe pse ky instrument mbetet i kufizuar në ndikim vetëm mbi ofertën monetare në monedhën kombëtare lek.

Të ftuarit në studio hodhën dritë edhe në lidhje me ftesën publike zyrtare të Kryeministrit të vendit ndaj publikut për të investuar kursimet e tyre në instrumentet e borxhit të Qeverisë. U diskutua në lidhje me mundësinë që Qeveria të jetë në nevojë për fonde, ndërkohë që ekspertët dhanë edhe idenë e një përpjekje të ekzekutivit për të kanalizuar kursimet e shqiptarëve në një instrument me norma relativisht të kënaqshme në kushtet e një rreziku të vogël. Nëpërmjet kësaj ftese Qeveria synon jo vetëm të kanalizojë një pjesë të depozitave pasive në sektorin bankar, por edhe të tërheqë fonde ende të lira që janë jashtë sektorit financiar duke ulur në këtë mënyrë koston e borxhit dhe varësinë e financimit nga bankat e nivelit të dytë.

 

Për të dëgjuar emisionin klikoni linkun: https://a2news.com/video/a2-business-nga-aurora-sulce/

Të ftuar në studio:

z. Ridvan Bode, Anëtar i Këshillit Mbikëqyrës të Bankës së Shqipërisë

zj. Heriola Spahiu, Eksperte e Sektorit Bankar dhe Kredidhënies

z. Artan Gjergji, Ekspert i Tregjeve Financiare