Përfshirja financiare dhe përfitimet nga digjitalizimi i shërbimeve financiare. Roli i bankave në përshpejtimin e procesit

Projektligji më i fundit, për të hapur llogari bankare për të gjithë popullatën duke nxitur shtresat më vunerabël në përdorimin e produktet bankare e financiare. Qëllimi është formalizimi dhe ulja e cash-it në ekonomi, por sfidë mbeten sulmet kibernetike.

Padyshim që është një politikë mjaft e rëndësishme e cila pritet të sjellë vec anë pozitive në ekonomi, jo vetëm në aspektin e përfshirjes financiare dhe përfitimit nga këto shërbim të të gjithë shtresave të popullatës, por edhe për qëllime të tjera të rëndësishme që kanë të bëjnë me rritjen e transparencës financiare, rritjen e luftës kundër pastrimit të parave dhe financimin e krimit.

Megjithatë, sipas z. Artan Gjergji, ekspert i tregjeve financiare: “Për t’ia arritur këtij qëllimi nuk mjafton vetëm vullneti pozitiv i Bankës së Shqipërisë dhe Qeverisë, të cilat janë kujdesur për të harmonizuar të gjithë kuadrin ligjor e rregullativ me direktivat e Bashkimit Europian dhe praktikat më të mira botërore në këtë fushë. Në këtë proces duhet padyshim që stafetën kryesore ta marrin bankat si institucionet financiare më të konsoliduara, të cilat kanë burimet e nevojshme financiare për të investuar në drejtim të modernizimit dhe digjitalizimit të shërbimeve financiare, pa lënë mënjanë edhe edukimin e publikut.

Më konkretisht, për shkak të  nivelit relativisht të ulët të konkurrencës në sektorin bankar (nga 16 banka para disa vitesh, tashmë në Shqipëri operojnë rreth 11 të tilla), këto të fundit e ndjekin me mjaft ngadalësi procesin e investimeve në drejtim të digjitalizimit të shërbimeve financiare, apo nuk bëjnë sa duhet për të reduktuar kostot e cash-it, për të reduktuar kohën e përdorimit në sportel të qytetarëve, apo për të ofruar më me efikasitet shërbimet online banking (m-banking apo e-banking). Nje tjetër element ku bankat duhe të jenë shumë të kujdesshme dhe të investojnë pa kursim është padyshim procesi i sigurisë elektronike (cybersecurity). Eksperiencat e përjetuara në vitin 2022, nuk patën ndikim të madh tek publiku pasi u administruan me profesionalizëm nga sektori bankar, por kjo nuk do të thotë që nuk mund të përballemi me sfida të reja.

Një tjetër shtyllë e rëndësishme që duhet marrë në konsideratë nga aktorët e tregut financiare për të përshpejtuar procesin e përfshirjes financiare, është edhe edukimi i publikut. Bankat por edhe institucionet financiare jo banka apo institucionet financiare FinTech duhet të bëjnë më shumë në drejtimt ë rritjes së sensibilizimit të qyetarëve ndja përfitimeve që sjell përdorimi i shërbimeve financiare digjitale. Këto institucione duhet të ndajnë buxhete të qarta në këtë drejtim dedikuar konsumatorëve të thjeshtë, e me një nivel modest të edukimit financiar” - tha z. Gjergji.

 

I ftuar:

Z. Artan Gjergji, ekspert i tregjeve dhe sherbimeve financiare.

Burimi: E-ZONE, linku: https://www.youtube.com/watch?v=VkkjUu5fQow